العطشان"""

عطش الحبيب فوق الصليب



مستني يا مين يرويه!



خلق للكون مَيَّه، شكِّلها فوق



الجَلَد ومن تحتيه!



مروي العطاشى طلب مَيَّه



قطرات، يا مين يدِّيه!



وعِطش المسيح!!
-----------------------------------------




على بير يعقوب جلس الحبيب



والشمس ضهرية!



مستني تيجي البِنيَّة، يرويها،



من مَيَّه إلهية!



وداست رجله الكريمة على



أرض مدهونة بخطية!



وعطش المسيح!!
-----------------------------------------




سامرية جاية عشان تملا



جرتها بالـمَيَّه!



عطشانة عطشانة عطشانة



طالبة غفران وحِنيَّة!



مرة ورا مرة تدوَّر تنادي:



ألقى فين أنا المَيَّه؟!



وجاها المسيح!!
-----------------------------------------



جاها يقول: لو كنتي عارفة إنتي


مع مين بتتكلمي؟



لو كنتي مشتاقة من جديد



تتولدي وتتعلمي؟



أرويكي من مَيَّه عندي،



لا تقاسي، لا تتألمي!



وظهر المسيح!!
-----------------------------------------




ورواها من مَيِّته الحلوة



من أطهر الينابيع!



راحت تقول للكل، الجار



والصاحبة، والمجاميع!



تعالوا اشربوا مجاناً،


دا يسوع ما بيبيع!



ومَلَك المسيح!!
-----------------------------------------




ودلوقتي واقف ينادي عليك



وانت هناك عطشان!



تعالَ واشرب مَيّتي ترتوي،



دايما في كل أوان!



ينبوع محبة يفيض جواك،



تمتلي بيه الأجران!



م الجنب الجريح!!
-----------------------------------------




اسمع صوته بينادي



وطاوعني ياللا وقوم!



اسرع واطلب مَيّته،



وبسرعة وبلاش نوم!



يزول كل عطشك، وتفرح،



وتنسى كل هموم!


ويَّا المسيح!!
-----------------------------------------